Lavrov Putinning ishonchini yo‘qotgani aytilmoqda
Rossiya tashqi ishlar vaziri Sergey Lavrovning siyosiy faoliyati bilan bog‘liq yangi tafsilotlar paydo bo‘ldi. Bu haqda Zamin.uz xabar berdi.
The Moscow Times nashri ma’lumotiga ko‘ra, Lavrov Rossiya prezidenti Vladimir Putinning ishonchini yo‘qotgan bo‘lishi mumkin. Bu holat, xususan, Putin va AQSH sobiq prezidenti Donald Tramp o‘rtasida Vengriyada rejalashtirilgan uchrashuvning bekor qilinishi bilan bog‘liq ekani aytilmoqda.
Kreml rasmiylari bergan ma’lumotga ko‘ra, Lavrov bu yilgi G20 sammitida Rossiya delegatsiyasiga rahbarlik qilmaydi. Uning o‘rniga Prezident administratsiyasi rahbarining o‘rinbosari Maksim Oreshkin delegatsiyaga boshchilik qiladi.
Bundan tashqari, Lavrov 5-noyabr kuni bo‘lib o‘tgan Rossiya Xavfsizlik kengashi yig‘ilishida ham qatnashmagan. Ushbu yig‘ilishda yadroviy sinovlarga tayyorgarlik masalalari muhokama qilingan.
Manbalarning xabar berishicha, Lavrovning hozirgi siyosiy holati 21-oktabr kuni AQSH davlat kotibi Marko Rubio bilan bo‘lib o‘tgan telefon suhbati bilan bog‘liq bo‘lishi mumkin. Ushbu muloqotdan so‘ng, Oq uy Tramp va Putinning Budapeshtdagi uchrashuvini bekor qilgan.
Rubio Rossiya muloqotga tayyor emas degan xulosaga kelgani ma’lum qilingan. Bundan tashqari, AQSH tomonidan “Rosneft” va “Lukoyl” kompaniyalariga nisbatan yangi sanksiyalar joriy etilgani ham Lavrovning siyosiy mavqeiga salbiy ta’sir ko‘rsatgani ta’kidlanmoqda.
Bu holatlar Lavrovning faoliyatiga bo‘lgan munosabatlarni yanada murakkablashtirgani qayd etilmoqda.
