Ukrainada rossiyalik harbiy xizmatchi Dmitriy Kurashov ukrain harbiy asirini otib o‘ldirgani uchun umrbod ozodlikdan mahrum etildi. Bu haqda Zamin.uz xabar berdi.
Ushbu hukm 6-noyabr kuni Zaporijjya viloyati Zavodskoy tuman sudida e’lon qilindi. Sud hay’ati Kurashovning harakatlarini xalqaro gumanitar huquqni va urush qoidalarini qo‘pol ravishda buzish deb baholadi.
Prokuror Nikita Manevskiy ayblanuvchiga nisbatan umrbod qamoq jazosi so‘radi. U sud jarayonida Dmitriy Kurashovning pushaymonlik bildirmaganini va o‘z qilmishiga befarq bo‘lganini ta’kidladi.
Ayblanuvchi sudda so‘zlashdan bosh tortdi, ammo uning advokati Anna Karpenko himoyasida Kurashov buyruqni bajarayotganini o‘ylaganini va shok holatida bo‘lganini aytdi. Biroq sud advokatning bu da’volarini inobatga olmadi.
Tergov ma’lumotlariga ko‘ra, voqea 2024-yil 6-yanvarda Zaporijjya viloyati Pologovskiy tumanida sodir bo‘lgan. Kurashov qurolsiz va taslim bo‘lgan ukrain harbiysi Vitaliy G.ni otib o‘ldirgan.
Guvohlarning so‘zlariga ko‘ra, Vitaliy qo‘llarini ko‘tarib, tiz cho‘kkan holatda turganida unga o‘q uzilgan. Sudda boshqa rossiyalik harbiy asirlar ham Kurashovning jinoyatini tasdiqlashdi.
Sudning xulosasiga ko‘ra, Kurashov xalqaro urush qoidalarini buzgan va asirni qasddan o‘ldirgani uchun aybdor deb topildi. Bu Ukraina sudlari tomonidan rossiyalik harbiyga chiqarilgan eng og‘ir hukmlardan biri hisoblanadi.
Hukm hali kuchga kirmagan va ayblanuvchining apellyatsiya berish huquqi mavjud. Ukraina huquqni muhofaza qilish organlari bu ish xalqaro jamoatchilik uchun muhim signal ekanini ta’kidladi.
Har qanday urush jinoyati, hatto front chizig‘ida sodir etilgan bo‘lsa ham, jazosiz qolmasligi kerak.
