Indoneziyaning poytaxti Jakarta shahrida juma namozi vaqtida masjidda kuchli portlash yuz berdi. Bu haqda Zamin.uz xabar berdi.
Hodisa 7-noyabr kuni Kelapa Gading shahridagi maktab majmuasi hududida joylashgan masjiddan kelib chiqqan. Bu haqda Reuters axborot agentligi xabar berdi.
Rasmiylarning ma’lum qilishicha, portlash oqibatida kamida 50 kishi jarohat olgan. Ularning ayrimlari og‘ir ahvolda shifoxonaga yotqizilgan.
Shahar politsiyasi rahbari Asep Edi Suheriy voqea sabablari tergov qilinayotganini bildirdi. Uning so‘zlariga ko‘ra, umumiy hisobda 54 kishi turli darajadagi tan jarohatlariga uchragan.
Jarohatlanganlar orasida yengil shikastlanganlar ham, og‘ir kuyishdan aziyat chekkanlar ham bor. Guvohlarning aytishicha, portlash juma xutbasi boshlangandan bir necha daqiqa o‘tgach sodir bo‘lgan.
Masjidda bo‘lgan matematika o‘qituvchisi Budi Laksononing so‘zlariga ko‘ra, portlashdan so‘ng xona qora tutun bilan to‘lgan, odamlar shoshilib tashqariga yugurgan, bolalar yig‘lagan, ba’zilar esa qo‘rquvdan yiqilgan. Portlash oqibatida jarohatlanganlarning aksariyati shisha sindiriqlari va tovush to‘lqinlaridan zarar ko‘rgan.
Ularga dastlabki tibbiy yordam Kelapa Gading tumani klinikasida ko‘rsatilgan. Tergovchilar voqea sabablarini o‘rganmoqda.
Hozirda bir nechta ehtimoliy versiyalar ko‘rib chiqilmoqda, jumladan elektr simlarining qisqa tutashuvi, elektron uskunalardagi nosozlik va qo‘lbola portlovchi qurilmadan foydalanish ehtimoli. Politsiya voqea joyida pnevmatik qurol, revolverga o‘xshash o‘qotar qurollar va masofadan boshqarish pultlari kabi shubhali buyumlarni topganini ma’lum qildi.
Hozirda barcha dalillar ekspertiza uchun yuborilgan. Tergov ishlari Indoneziya ichki ishlar va xavfsizlik idoralari tomonidan nazorat qilinmoqda.
