O‘zbekiston delegatsiyasi Milliy olimpiya qo‘mitasi raisi Adham Ikromov va MOQ vitse-prezidenti Otabek Umarov boshchiligida Saudiya Arabistoni poytaxti Er-Riyodga VI Islom birdamligi o‘yinlari "Riyod-2025" ochilish marosimida ishtirok etish uchun yetib bordi. Bu haqda Zamin.uz xabar berdi.
Delegatsiya a’zolarini Er-Riyod xalqaro aeroportida Saudiya Arabistoni Olimpiya qo‘mitasi Ijroiya qo‘mitasi a’zosi shahzoda Abdulloh Fotih al-Saud kutib oldi. Samimiy qabul davomida tomonlar bir-birlarini tabriklab, bunday yirik sport tadbirlarida ishtirok etish ikki tomonlama hamkorlikni rivojlantirishda muhim ahamiyatga ega ekanligini ta’kidladilar.
Delegatsiya yetib kelganidan so‘ng Milliy olimpiya qo‘mitasi vakillari va Islom o‘yinlari Tashkiliy qo‘mitasi rahbariyati o‘rtasida rasmiy uchrashuv tashkil etildi. Uchrashuv davomida sport sohasidagi hamkorlikni mustahkamlash, yosh avlod uchun sport dasturlarini rivojlantirish hamda qo‘shma o‘quv-mashg‘ulot yig‘inlarini tashkil etish masalalari muhokama qilindi.
Bu kabi tadbirlar mamlakatlar o‘rtasida sport aloqalarini kengaytirishga xizmat qiladi.
