“Miss Universe 2025” tanlovi mojarolar bilan boshlandi
Dunyo miqyosidagi eng nufuzli go‘zallik tanlovlaridan biri bo‘lgan “Miss Universe 2025” tanlovi Tailandning Bangkok shahrida o‘tkazilmoqda. Bu haqda Zamin.uz xabar berdi.
Ammo tanlovning ilk kunlaridanoq u go‘zallik musobaqasidan ko‘ra, katta shov-shuvlar bilan yodda qoldi. Bu haqda “International Business Times” xabar berdi.
5-noyabr kuni o‘tkazilgan tantanali kutib olish marosimi kutilmagan voqealar bilan kechdi. Tanlov vitse-prezidenti Navat Itsaragrisil homiylik fotosessiyasida qatnashmagan “Miss Mexico” vakili Melisse Floresni omma oldida tanqid qilib, uni “ahmoq” deb atadi.
Ushbu keskin so‘zlardan so‘ng zaldagi muhit o‘zgardi, ko‘plab ishtirokchilar esa norozilik belgisi sifatida tadbirni tark etishdi. Voqea jonli efir paytida sodir bo‘lgani aytilmoqda.
Hatto xavfsizlik xodimlariga Meksika vakilini tadbirdan chiqarib yuborish buyrug‘i berilgan. Melisse Flores bunga javoban sahnadan chiqib, o‘z noroziligini ochiq bayonot orqali ifoda etdi.
U quyidagicha fikr bildirdi: “Men XXI asrda yashayapman va hech kim menga qo‘g‘irchoqdek munosabatda bo‘lishga haqli emas. Bu tanlov faqat go‘zallik haqida emas, balki ayollarning ovozini eshittirish haqida.” Shuningdek, 2024 yilgi “Miss Universe” g‘olibi Viktoriya Ker Teylvig ham Melisse Floresni qo‘llab-quvvatlab, tadbirni tark etganini ma’lum qildi.
Ushbu hodisalar ijtimoiy tarmoqlarda keng muhokamalarga sabab bo‘ldi. Ma’lumot uchun, “Miss Universe” tanlovi 74-marta o‘tkazilmoqda.
Joriy yilda unda 79 mamlakat vakillari qatnashmoqda. 2025 yilgi tanlovda Chexiyalik model Natali Pushkinova g‘olib deb topilgan.
Kolumbiya va Kuba vakillari esa maxsus sovrinlarga loyiq ko‘rilgan.
