Suriya prezidenti AQSHga ilk rasmiy tashrifini boshladi
Suriya prezidenti Ahmad ash-Shar’a AQSH poytaxti Vashingtonga rasmiy tashrif bilan keldi. Bu haqda Zamin.uz xabar berdi.
Bu haqda Suriya davlat axborot agentligi SANA xabar berdi. Ushbu tashrif Suriya mustaqillikka erishgan 1946-yildan buyon mamlakat rahbari tomonidan AQSHga amalga oshirilgan ilk rasmiy safar sifatida tarixda qayd etildi.
Ma’lumotlarga ko‘ra, Ahmad ash-Shar’a 10-noyabr kuni Oq uyda AQSH prezidenti Donald Tramp bilan uchrashuv o‘tkazadi. Muzokaralar davomida ikki davlat o‘rtasidagi siyosiy va iqtisodiy aloqalarni yangi bosqichga olib chiqish, xavfsizlik sohasidagi hamkorlikni mustahkamlash hamda mintaqadagi terrorizmga qarshi kurash masalalari muhokama qilinadi.
Tashrif oldidan Vashington va Damashq o‘rtasidagi munosabatlarda iliqlik kuzatilgani ta’kidlanmoqda. Xususan, 7-noyabr kuni AQSH ma’muriyati Ahmad ash-Shar’aga nisbatan avval qo‘llangan shaxsiy sanksiyalarni bekor qildi.
Shuningdek, BMT Xavfsizlik Kengashi ham Suriya prezidentiga qarshi xalqaro cheklovlarni olib tashlash bo‘yicha qaror qabul qildi. Tahlilchilarning fikricha, ushbu tashrif Suriya va AQSH o‘rtasidagi diplomatik munosabatlarni tiklash yo‘lida muhim qadam bo‘lishi mumkin.
Ayrim xalqaro ekspertlar buni «o‘zaro ishonchni tiklash yo‘lidagi ramziy harakat» sifatida baholamoqda. Uchrashuv natijasida ikki davlat nafaqat siyosiy aloqalarni yaxshilash, balki iqtisodiy hamkorlik va gumanitar yordam sohalarida ham yangi imkoniyatlarni ochishi kutilmoqda.
Siyosiy sharhlovchilar bu tashrifni Suriya tashqi siyosatining yangi bosqichi deb atashmoqda.
