Pashinyan: Qorabog‘ bo‘yicha qarorimiz xato bo‘lgan
Armaniston bosh vaziri Nikol Pashinyan 2020-yilda sodir bo‘lgan Ikkinchi Qorabog‘ urushi haqida ochiq bayonot berdi. Bu haqda Zamin.uz xabar berdi.
U o‘z bayonotida, agar o‘sha paytda Armaniston hukumati Qorabog‘ni Ozarboyjonga tegishli hudud sifatida tan olganida, urushni oldini olish ehtimoli bo‘lganini ta’kidladi. Pashinyanning so‘zlariga ko‘ra, 2018–2019-yillarda bunday qaror qabul qilish imkoniyati mavjud edi, ammo bu amalga oshmagan.
U o‘zining o‘shandagi qarorini xato deb baholadi, lekin bu qarorni qabul qilishning o‘sha vaqtda juda qiyin bo‘lganini ham aytib o‘tdi. Chunki bunday qaror mamlakat ichida katta norozilik va qarshiliklarga sabab bo‘lishi mumkin edi.
Pashinyanning bu bayonoti Armaniston jamiyatida turli munozaralarga sabab bo‘ldi. Ayrimlar uning so‘zlarini halollik va xatoni tan olish sifatida qabul qilishdi, boshqalar esa bu fikrlarni milliy manfaatlarga zid deb baholashdi.
2020-yilda 44 kun davom etgan Qorabog‘ urushi davomida Ozarboyjon o‘zining ilgari yo‘qotgan bir qancha hududlarini qaytarib oldi va tog‘li hududlar ustidan nazoratni tikladi. Bu mojaro nafaqat mintaqadagi, balki xalqaro siyosiy munosabatlarga ham ta’sir ko‘rsatdi.
Mutaxassislarning fikriga ko‘ra, Pashinyanning bu bayonoti Armanistonning yangi tashqi siyosiy yo‘nalishiga mos keladi. Uning aytishicha, tarixdan saboq olish va yangi mojarolarga yo‘l qo‘ymaslik Armaniston uchun bugungi asosiy vazifalardan biridir.
Shu bilan birga, Armaniston jamiyati Qorabog‘ masalasini hal etilmagan milliy fojia sifatida qabul qilishda davom etmoqda.
