Hirotda ayollarga burqasiz muassasalarga kirish taqiqlandi

Afg‘onistonning Hirot viloyatida Tolibon ayollarga burqasiz shifoxonalarga yoki boshqa davlat muassasalariga kirishni qat’iyan taqiqladi. Bu haqda Zamin.uz xabar berdi.

Bu cheklov Ezgulikni targ‘ib qilish va illatlarning oldini olish boshqarmasi tomonidan qabul qilingan yangi tartibga asoslangan. Avval ayollar tibbiy muassasalarga hijob, niqob yoki chador kiygan holda kirishlari mumkin edi.

Ammo yangi qarorga ko‘ra, faqat burqa — tanani va yuzni to‘liq yopuvchi, ko‘zlari to‘r bilan qoplangan kiyim — ruxsat etilgan. Endilikda Hirotda nafaqat bemor ayollar, balki ayol shifokorlar va hamshiralar ham burqa kiyishga majbur.

Shuningdek, Haj va diniy ishlar vazirligi taksi haydovchilariga burqasiz ayollarni tashimaslikni tavsiya qilgan. Ko‘plab haydovchilar bu talabga rioya qilishga majbur bo‘lmoqda.

Ijtimoiy tarmoqlarda burqa kiygan tibbiyot xodimlarining yosh bemorlarga emlash jarayonida tushirilgan suratlari keng muhokama qilinmoqda. Mutaxassislar bu cheklov ayollarning sog‘liqni saqlash xizmatlaridan foydalanishini yanada murakkablashtirishi va ularning tibbiy yordamga bo‘lgan imkoniyatlarini cheklashi mumkinligini ta’kidlamoqda.