Daniya bolalarni ijtimoiy tarmoq xavfidan himoya qiladi
Daniya hukumati yoshlarni internetdagi xavflardan himoya qilish maqsadida 15 yoshdan kichik bolalarga ijtimoiy tarmoqlardan foydalanishni cheklashni nazarda tutuvchi qonun loyihasini taqdim etdi. Bu haqda Zamin.uz xabar berdi.
Ushbu tashabbus bolalarni zararli kontent, nojo‘ya axborot va onlayn reklama ta’siridan himoya qilishga qaratilgan. Qonun loyihasiga muvofiq, ijtimoiy tarmoq platformalari foydalanuvchilarning yoshini aniqlash bo‘yicha mas’uliyatni zimmasiga oladi.
Agar belgilangan talablarga rioya qilinmasa, kompaniyalarga yillik global daromadining 6 foizigacha jarima solinishi mumkin. Statistik ma’lumotlarga ko‘ra, Daniyada 13 yoshgacha bo‘lgan bolalarning 94 foizi ijtimoiy tarmoqlardan foydalanadi.
Mutaxassislar bu holatni xavotirli deb hisoblab, yosh avlodning ruhiy salomatligini muhofaza qilish zarurligini ta’kidlamoqda. Hukumat ushbu qarorni “internetda sog‘lom va xavfsiz muhit yaratish yo‘lidagi muhim qadam” sifatida baholadi.
Mazkur qonun yoshlarni zararli ta’sirlardan asrashga va ularning sog‘lom rivojlanishini ta’minlashga xizmat qilishi kutilmoqda.
