The New York Times gazetasining xabariga ko‘ra, AQSH prezidenti Donald Tramp ma’muriyati Venesuela bilan bog‘liq harbiy aralashuv bo‘yicha bir nechta ssenariylarni ishlab chiqmoqda. Bu haqda Zamin.uz xabar berdi.
Ushbu rejalar Venesuela prezidenti Nikolas Maduroni hokimiyatdan chetlatish va mamlakatdagi siyosiy vaziyatni o‘zgartirishga qaratilgan. Birinchi ssenariyga ko‘ra, AQSH havo kuchlari Venesueladagi strategik harbiy obyektlarga zarba berishi mumkin.
Maqsad — Maduroning xavfsizlikka bo‘lgan ishonchini yo‘qotish va uni mamlakatni tark etishga yoki muzokaralarga rozi bo‘lishga majbur qilish. Biroq ayrim tahlilchilar bunday chora aks ta’sir ko‘rsatishi, xalqni Maduroning atrofida birlashtirishi mumkinligini ta’kidlamoqda.
Ikkinchi variant maxsus operatsiyani o‘z ichiga oladi. Unda AQSHning maxsus bo‘linmalari, masalan, “Delta” yoki SEAL Team 6 kuchlari Venesuelaga yuborilishi mumkin.
Ularning vazifasi Maduroni qo‘lga olish yoki yo‘q qilish bo‘lishi mumkin. Tramp ma’muriyati Maduroni narkokartel rahbari sifatida ko‘rsatish orqali bunday operatsiyani qonuniylashtirishga urinmoqda.
Uchinchi ssenariy keng ko‘lamli harbiy operatsiyani nazarda tutadi. Unda AQSH desantchilari Venesuelaning aerodromlari va neft konlarini nazoratga olishi mumkin.
Ushbu reja iqtisodiy resurslar ustidan nazorat o‘rnatishni ko‘zlaydi, biroq bu variant katta xavf va yo‘qotishlarga olib kelishi ehtimoli yuqori. Shu bilan birga, Tramp harbiy xizmatchilarning xavfsizligini inobatga olib, ehtiyotkorlik bilan harakat qilmoqda.
Rejada uzoq masofali qurollar va dronlardan foydalanish ko‘zda tutilgan. Ma’lum bo‘lishicha, AQSH harbiy kemalari va samolyotlari allaqachon Karib dengizida joylashgan.
Shuningdek, AQSH Adliya vazirligi harbiy harakatlarni qonuniy asoslash bo‘yicha maslahat bergan. So‘nggi ma’lumotlarga ko‘ra, Venesuela prezidenti Nikolas Maduro Rossiya, Eron va Xitoydan harbiy yordam so‘ragan.
Mutaxassislar bu vaziyatni xalqaro siyosatda yaqin kunlardagi asosiy mavzulardan biri bo‘lishi mumkinligini qayd etmoqda.
