Ilon Mask trillion dollarlik mukofotga da’vogar bo‘ldi
Texas shtatida o‘tkazilgan yillik kongressda Tesla kompaniyasi aksiyadorlari kompaniya asoschilaridan biri va bosh direktori Ilon Mask uchun 1 trillion dollar miqdorida mukofot berishni tasdiqladi. Bu haqda Zamin.uz xabar berdi.
Bu haqda The Guardian nashri xabar berdi. Mazkur qarorni aksiyadorlarning 75 foizdan ortig‘i qo‘llab-quvvatlagan.
Ushbu mukofotni olish uchun Ilon Mask kelgusi o‘n yil davomida Tesla robot taksilarining ishlab chiqarilishini kengaytirishi hamda kompaniyaning bozor qiymatini 1 trillion dollardan 8,5 trillion dollargacha oshirishi talab etiladi. Shuningdek, shartlarni muvaffaqiyatli bajargani uchun Mask kompaniya aksiyalarining 12 foiziga ega bo‘ladi.
Bundan tashqari, Mask kompaniyaning sof foydasini ketma-ket to‘rt chorak davomida 400 milliard dollarga yetkazishi zarur. Taqqoslash uchun, 2025 yilning uchinchi choragida bu ko‘rsatkich 4,2 milliard dollarni tashkil etadi.
E’tiborga molik jihati shundaki, Mask ish jarayonida na maosh, na mukofot oladi. Ammo agar biznesmen ushbu ko‘rsatkichlarga erishsa va bir martalik to‘lovni qo‘lga kiritsa, uning umumiy boyligi 2 trillion dollarga yetib, uni dunyoning birinchi trillioneri maqomiga olib chiqishi mumkin.
Shuningdek, nashrning qayd etishicha, Maskga to‘lanadigan ushbu mablag‘ ayrim davlatlarning yalpi ichki mahsulotidan ham oshib ketadi. Jumladan, Irlandiya, Shvetsiya va Argentina kabi mamlakatlarning iqtisodiy ko‘rsatkichlari bilan taqqoslaganda, bu raqam ulardan yuqori bo‘ladi.
