Toshkentda 600 dan ortiq fuqaroni aldagan guruh ushlandi
Toshkent viloyatida internet orqali fuqarolarni aldash bilan shug‘ullangan kiberguruh faoliyati fosh etildi. Bu haqda Zamin.uz xabar berdi.
Bu haqda Ichki ishlar bosh boshqarmasi axborot berdi. Ma’lumotlarga ko‘ra, Telegram va Instagram orqali "limitlash xizmati"ni taklif qilgan to‘rt nafar shaxs 600 ga yaqin fuqarodan umumiy hisobda 1 milliard so‘mdan ortiq mablag‘ni firibgarlik yo‘li bilan qo‘lga kiritgan.
2005 yilda tug‘ilgan B.N. ismli shaxs va uning sheriklari mikromoliya tashkilotlaridan olingan kredit limitlarini naqd pulga aylantirib berishni va’da qilib, fuqarolarning ishonchiga kirgan.
Ular o‘zlari tashkil qilgan firma orqali onlayn savdo platformalarida operatsiyalarni amalga oshirib, mablag‘larni o‘z manfaatlariga yo‘naltirgan. Ichki ishlar organlari tomonidan olib borilgan tezkor tadbirlar natijasida mazkur guruhning noqonuniy faoliyatiga chek qo‘yildi.
Hozirda gumonlanuvchilarga nisbatan O‘zbekiston Respublikasi Jinoyat kodeksining 168-moddasi 4-qismi "a" bandi (firibgarlik) bo‘yicha jinoyat ishi qo‘zg‘atilgan. Gumonlanuvchilar hibsga olingan bo‘lib, tergov jarayonida yetkazilgan zararni qoplash va boshqa ishtirokchilarni aniqlash bo‘yicha ishlar davom etmoqda.
