Qirg‘iziston 2023 yilning yanvar-avgust oylarida O‘zbekistonga 678 tonna guruch eksport qildi. Bu haqda Zamin.uz xabar berdi.
Bu ko‘rsatkich o‘tgan yilga nisbatan 8 barobar ko‘p. Moliyaviy jihatdan esa guruch eksportidan tushgan daromad 78 ming dollardan 388 ming dollarga yetdi.
Jami hisobda, Qirg‘iziston bu davrda 1 ming tonnadan ortiq guruchni 715 ming dollarga eksport qilgan. Sentabr oyining boshiga kelib, O‘zbekiston Qirg‘iziston guruchining eng yirik xaridori sifatida qolmoqda.
Keyingi o‘rinlarda Turkiya (308 tonna) va Rossiya (17 tonna) joylashgan. O‘zbekiston Milliy statistika qo‘mitasi ma’lumotlariga ko‘ra, joriy yilning sakkiz oyida ikki davlat o‘rtasidagi savdo aylanmasi 597 million dollarga yetgan.
Qirg‘iziston O‘zbekistonning asosiy savdo hamkorlari ro‘yxatida 20-o‘rinda turadi. Umuman olganda, 2023 yilning sentabr boshiga kelib, O‘zbekiston xorijdan jami 2,6 milliard dollarlik oziq-ovqat mahsulotlari import qilgan.
Bu summaning 609 million dollari don mahsulotlariga to‘g‘ri keladi. Mazkur ko‘rsatkich yil davomida 6,2 foizga oshgan.
