Qozog‘istonning QazaqGaz gaz transport kompaniyasi 2025-yilda Rossiya gazining O‘zbekistonga tranziti hajmi 6 milliard kubometrga yetishi kutilayotganini ma’lum qildi. Bu haqda Zamin.uz xabar berdi.
2024-yilda bu ko‘rsatkich 5,6 milliard kubometrni tashkil etishi rejalashtirilmoqda. Bu haqda «Kazinform» xabar berdi.
Rossiyadan O‘zbekistonga gaz tranziti 2023-yilda boshlangan bo‘lib, bu jarayon uchun «Markaziy Osiyo – Markaz» gaz quvuri ishlatilmoqda. «Intergaz Markaziy Osiyo» kompaniyasining ma’lumotlariga ko‘ra, mazkur quvurda ta’mirlash ishlari amalga oshirilgan va aniqlangan 10 mingdan ortiq nuqsonlardan 6 mingtasi bartaraf etilgan.
Hozirda har kuni Qozog‘iston orqali O‘zbekistonga 178 million kubometr gaz yetkazib berilmoqda. Kelgusida ushbu tranzit hajmini yiliga 11 milliard kubometrga yetkazish rejalashtirilgan.
«Intergaz Markaziy Osiyo» kompaniyasi bu o‘sish sur’atiga mos ravishda infratuzilmani takomillashtirish bo‘yicha ish olib borayotganini ta’kidladi. 2023-yil oktabr oyining boshiga kelib, O‘zbekiston xorijdan umumiy qiymati 932,3 million dollarlik gaz import qilgan.
Bu ko‘rsatkich o‘tgan yilga nisbatan 29,7 foizga kamaygan. Shu bilan birga, mamlakat gaz eksport hajmini 546,2 million kubometrga yetkazib, yillik o‘sish sur’ati 15,4 foizni tashkil etdi.
