Sankt-Peterburgda muhojirlar taqiqi taksi narxini oshirdi
Sankt-Peterburg shahrida muhojirlarning taksichilik faoliyati bilan shug‘ullanishiga taqiq joriy etilgan kunning o‘zidayoq taksi narxlari sezilarli darajada oshdi. Bu haqda Zamin.uz xabar berdi.
Mahalliy “Fontanka.ru” nashrining xabar berishicha, narxlar ba’zi yo‘nalishlarda 30 foizgacha ko‘tarilgan. Jurnalistlar tomonidan 6 va 7-noyabr kunlari “Yandeks Taksi” ilovasidagi “Komfort” tarifida shaharning turli yo‘nalishlaridagi narxlar tahlil qilindi.
Tahlil natijalariga ko‘ra, taqiq kuchga kirgan 7-noyabr kuni ba’zi yo‘nalishlarda narxlar 3,2 foizdan 32,5 foizgacha oshgani aniqlangan. Shuningdek, ko‘plab foydalanuvchilar taksi chaqirmoqchi bo‘lganida, ilova ularga haydovchilar yetishmasligi va uzoqroq kutishga to‘g‘ri kelishini bildirgan.
Bu holat shahar aholisi uchun qo‘shimcha noqulayliklar tug‘dirgan. “Yandeks Taksi” ma’muriyatining ma’lumotiga ko‘ra, yangi cheklovlar sababli shaharda faoliyat yuritayotgan taksichilar soni 12 foizga qisqargan.
Bu taxminan 4 ming haydovchining ishsiz qolishiga olib kelgan. Mutaxassislar fikricha, bu o‘zgarish sohadagi kadrlar tanqisligini yanada kuchaytiradi.
Gubernator Aleksandr Beglovning avgust oyidagi qaroriga muvofiq, muhojirlar nafaqat taksichilik, balki kurerlik faoliyati bilan ham shug‘ullana olmaydi. Rasmiylar bu chorani norasmiy bandlikka qarshi kurash va xizmatlar sohasida xavfsizlikni oshirish bilan izohlagan.
Mahalliy iqtisodchilarning fikricha, bu qaror taksi xizmatlarida raqobatni kamaytirishi va narxlarning yanada oshishiga olib kelishi mumkin. Natijada, ko‘plab aholi uchun oddiy taksi xizmati qimmatga tushadigan xizmatga aylanmoqda.
