Mali shimolida bloger Mariam Sisse o‘ldirildi
Mali shimolida taniqli TikTok blogeri Mariam Sisse o‘z faoliyati sababli qurbon bo‘ldi, deb xabar bermoqda SCMP nashri. Bu haqda Zamin.uz xabar berdi.
Ma’lumotlarga ko‘ra, Tonka shahrida istiqomat qilgan va 90 mingdan ortiq obunachiga ega bo‘lgan yosh bloger jangarilar guruhi tomonidan o‘g‘irlab ketilgan. Keyinchalik uning qatl etilgani ma’lum bo‘ldi.
Sissening oilasi va mahalliy manbalar ham ushbu ma’lumotni tasdiqladi. Aytilishicha, Mariam Sisse hududdagi voqealarni suratga olib, ular haqida ijtimoiy tarmoqlarda ma’lumot tarqatgani uchun jangarilar nishoniga aylangan.
Shuningdek, bloger TikTok orqali Mali armiyasiga ma’lumot yetkazganlikda gumon qilingan. Ushbu voqea mamlakatda blogerlar xavfsizligi va so‘z erkinligi masalalarini yana bir bor dolzarb muammoga aylantirdi.
Mahalliy aholi ijtimoiy tarmoqlarda jurnalistlar va kontent yaratuvchilarni himoya qilish uchun qat’iy choralar ko‘rishni talab qilmoqda.
