Hirotda ayollarga paranjisiz jamoat joylari taqiqlandi
Afg‘onistonning Hirot viloyatida ayollarga nisbatan yangi qat’iy cheklovlar joriy qilindi. Bu haqda Zamin.uz xabar berdi.
Viloyat hokimi Zana Vohidning yangi buyrug‘iga ko‘ra, endilikda ayollar paranjisiz holda maktablar, davlat muassasalari, shifoxonalar va boshqa jamoat joylariga kirish huquqidan mahrum bo‘ldi. Ushbu taqiq nafaqat ta’lim muassasalariga, balki banklar va qamoqxonalarga ham taalluqli hisoblanadi.
Guvohlarning aytishicha, hijobda bo‘lgan ayollar ham ko‘p hollarda binolarga kiritilmayotgani va ko‘chada uzoq vaqt kutishga majbur bo‘layotgani kuzatilmoqda. Shuningdek, “Tolibon” hukumati mahalliy taksi haydovchilariga burqasiz ayollarni tashimaslik haqida ko‘rsatma bergan.
Viloyat bo‘ylab nazorat postlari tashkil etilgan bo‘lib, paranjisiz ayollarni olib yurgan haydovchilar jazolanayotgani ma’lum qilinmoqda. O‘tgan yilning oktyabr oyida “Tolibon” Hirot shahridagi ayollar kafesining faoliyatini ham noma’lum sabablarga ko‘ra to‘xtatgan edi.
Bundan tashqari, oliy ta’lim vazirligi universitetlardagi professor va xodimlarga ish vaqtida smartfonlardan foydalanishni taqiqlab qo‘ydi. Ushbu talab ish samaradorligini oshirish maqsadida kiritilgani ta’kidlangan.
Hirot viloyatida ayollarning ta’lim olish, tibbiy xizmatlardan foydalanish va erkin harakatlanish imkoniyatlari tobora cheklanmoqda. Bu holat xalqaro nodavlat tashkilotlar tomonidan tashvish bilan qarshi olinmoqda.
