Nyu-Dehlida portlash: 8 kishi halok, 24 yarador
Hindiston poytaxti Nyu-Dehlida sodir bo‘lgan kuchli portlash butun shahar aholisi e’tiborini tortdi. Bu haqda Zamin.uz xabar berdi.
Mahalliy axborot vositalarining xabar berishicha, portlash tarixiy Qizil qal’a yaqinida, aholi zich yashaydigan hududda yuz bergan. Dastlabki ma’lumotlarga ko‘ra, metro bekati yaqinida to‘xtab turgan avtomobilda portlash sodir bo‘lgan.
Hodisa oqibatida kamida sakkiz kishi halok bo‘lgan, yana 24 kishi turli darajada jarohat olgan. Jabrlanganlar yaqin atrofdagi shifoxonalarga yetkazilgan, ba’zilarining ahvoli og‘ir ekani ma’lum qilingan.
Portlashning aniq sabablari hozircha noma’lum. Hodisa joyiga tergov guruhi, kriminalistlar va texnik mutaxassislar jalb qilingan.
Ular portlash joyini o‘rganib, hodisaning kelib chiqish sabablarini aniqlash ustida ish olib bormoqda. Favqulodda vaziyatlar xizmati hodisaga tezkor javob berib, voqea joyiga 25 ta o‘t o‘chirish mashinasini yo‘naltirgan.
Politsiya hududni nazoratga olib, transport harakatini vaqtincha to‘xtatgan. Aholi xavfsiz joylarga evakuatsiya qilingan.
Hindiston ichki ishlar vazirligi mazkur voqea bo‘yicha maxsus tergov komissiyasi tuzilganini e’lon qildi. Hozircha portlashning terrorchilik harakati yoki texnik nosozlik bilan bog‘liq ekani haqida rasmiy ma’lumot berilmagan.
Ayni paytda shahardagi boshqa muhim obyektlar atrofida xavfsizlik choralari kuchaytirilgan. Mutaxassislar fikricha, bu hodisa mamlakatda xavfsizlikni mustahkamlash zarurligini yana bir bor ko‘rsatmoqda.
