Malida taniqli TikTok blogeri Mariam Sisse fojiali tarzda halok bo‘ldi. Bu haqda Zamin.uz xabar berdi.
U TikTok platformasida 90 mingdan ortiq obunachiga ega bo‘lib, asosan Tonka shahri hayoti, odatlari va xalqning kundalik turmushini yorituvchi videolar tayyorlab kelgan. Shuningdek, u ijtimoiy mavzular va yumorga boy kontent yaratib, yoshlar orasida katta obro‘ qozongan edi.
Ushbu holat haqida South China Morning Post xabar berdi. 7-noyabr kuni Mariamni noma’lum jihodchilar guruhi hibsga olgan.
Ular blogerni Mali armiyasi bilan hamkorlik qilganlikda, ya’ni harbiylarga ma’lumot yetkazganlikda ayblashgan. Marhumaning akasining so‘zlariga ko‘ra, “Singlimni payshanba kuni jihodchilar olib ketishdi.
Ular uni armiyaga ishlaganlikda ayblab, ertasi kuni ochiqchasiga qatl qilishdi”. Shanba kuni Mariam Sisse mototsiklda Tonka shahri markaziga olib kelinib, shaharning Mustaqillik maydonida ko‘pchilik oldida otib o‘ldirilgan.
Xavfsizlik xizmati ushbu hodisani “varvarlik va qonunsizlikning eng yuqori darajasi” deb atadi. Mahalliy rasmiylar bu jinoyatni keskin qoralab, uni “jamiyatga qarshi qaratilgan qotillik” sifatida baholadi.
Malida so‘nggi yillarda jihodchi guruhlar faoliyati kuchaygan. Xususan, “Al-Qoida” bilan bog‘liq JNIM tashkiloti mamlakat shimolidagi ayrim hududlarda yo‘l va yonilg‘i yetkazib berish tizimini izdan chiqargan.
Bu esa maktablarning yopilishiga va qishloq xo‘jaligi faoliyatining to‘xtashiga olib kelgan. Ma’lumki, Malida 2012-yildan beri qurolli isyonchilar bilan to‘qnashuvlar davom etmoqda.
2021-yilda esa harbiy xunta hokimiyatni egallab, mamlakatda xavfsizlikni tiklash va ekstremizmga qarshi kurashishni asosiy vazifa sifatida belgilagan. Mariam Sissening o‘limi nafaqat Malida, balki butun Afrika bo‘ylab ijtimoiy tarmoq faollari xavfsizligi masalasini yana kun tartibiga olib chiqdi.
