Xitoylik boylar Singapur o‘rniga BAAni tanlamoqda

So‘nggi ikki yil ichida Xitoyning boy fuqarolari orasida o‘ziga xos yangi tendensiya kuzatilmoqda. Bu haqda Zamin.uz xabar berdi.

Ilgari ular investitsiya va biznes uchun Singapurga ustuvorlik berib kelgan bo‘lsa, bugungi kunda Birlashgan Arab Amirliklariga (BAA) ko‘chishni afzal ko‘rishmoqda. Bu haqda *Financial Times* nashri xabar bermoqda.

Avval Singapur Osiyo biznesmenlari uchun eng jozibador yo‘nalish bo‘lib kelgan. Ammo hozirda Dubay va Abu-Dabi yangi iqtisodiy markaz sifatida yetakchilik qilmoqda.

Xitoylik tadbirkorlar nafaqat bu hududlarda yashashni, balki doimiy fuqarolikni qo‘lga kiritishni ham maqsad qilishmoqda. BAA hukumati ma’lumotlariga ko‘ra, 2022-yilda xorijliklarga qariyb 80 mingta "oltin viza" berilgan.

Bu maxsus viza chet ellik fuqarolarga uzoq muddatga mamlakatda yashash va ishlash imkonini yaratadi. M/HQ kompaniyasi rahbari Yan Mrazekning ta’kidlashicha, ko‘plab xitoylik oilalar BAAda yangi investitsiya loyihalarini amalga oshirish uchun Singapurdagi mulklarini sotib yuborgan.

Unga ko‘ra, pandemiya davrida Xitoy va Singapurda joriy etilgan qattiq karantin cheklovlari ko‘plab sarmoyadorlarni BAAga yo‘naltirgan. Mutaxassislarning fikricha, BAAni tanlashning asosiy sabablari soliq imtiyozlari, xavfsiz muhit, rivojlangan infratuzilma va xalqaro biznes bilan aloqalardir.

Shunday qilib, Dubay va Abu-Dabi bugungi kunda Osiyoning boy fuqarolari uchun yangi iqtisodiy boshpana sifatida e’tirof etilmoqda.