Berlinda ayol bir vaqtda besh egizakni tug‘di

Germaniyaning Berlin shahrida yuz bergan noyob voqea mahalliy va xalqaro jamoatchilik e’tiborini tortdi. Bu haqda Zamin.uz xabar berdi.

Mahalliy ayol bir vaqtning o‘zida besh nafar chaqaloqni dunyoga keltirdi. Ushbu voqea sentyabr oyining oxirida mamlakatning yirik tibbiyot muassasalaridan biri — “Sharite” klinikasida ro‘y berdi.

Tug‘ruq kesarcha kesish orqali amalga oshirilib, unda 25 nafar shifokor ishtirok etdi. Ayol uch qiz va ikki o‘g‘il farzandni dunyoga keltirdi.

Berliner Morgenpost gazetasining xabar berishicha, hozirda ona va chaqaloqlarning sog‘lig‘i yaxshi. Ular shifokorlar nazorati ostida bo‘lib, yaqin kunlarda uylariga chiqarilishi kutilmoqda.

“Sharite” klinikasi mutaxassislari besh egizakning tug‘ilishini juda noyob hodisa sifatida baholadilar. Statistik ma’lumotlarga ko‘ra, tabiiy yo‘l bilan bunday homiladorlik 50 million holatdan faqat bittasida uchraydi.

Klinikaning akusherlik bo‘limi boshlig‘i Volfgang Xenrix bu jarayonni shunday izohladi: “Bunday tug‘ruqlar hatto tajribali shifokorlar uchun ham katta sinov hisoblanadi. Ushbu jarayon jismoniy va ruhiy tayyorgarlik, shuningdek, jamoaviy ishni talab qiladi.” Germaniyada bolali oilalar uchun davlat tomonidan keng ko‘lamli moddiy yordam tizimi joriy etilgan.

“Kindergeld” deb ataluvchi bola nafaqasi har oy farzandli ota-onalarga to‘lanadi. 2024-yilgi me’yorlarga ko‘ra, birinchi va ikkinchi bola uchun 219 yevro, uchinchi bola uchun 225 yevro, to‘rtinchi va undan keyingi bolalar uchun esa 250 yevro miqdorida nafaqa belgilangan.

Ushbu to‘lov bola 18 yoshga to‘lguncha davom etadi, agar bola o‘qishni davom ettirsa yoki ish izlayotgan bo‘lsa, 21 yoshga qadar uzaytiriladi. Shu tariqa, Berlindagi ushbu tug‘ruq nafaqat tibbiy yutuq, balki Germaniyada oilalarga ko‘rsatilayotgan e’tibor va qo‘llab-quvvatlashning yorqin namunasidir.