David Saley Buker mukofotini “Tana” romani bilan qo‘lga kiritdi
Londonda bo‘lib o‘tgan rasmiy marosimda irland dramaturgi va hakamlar hay’ati raisi Roddi Doyl 2023-yilgi Buker mukofoti g‘olibini e’lon qildi. Bu haqda Zamin.uz xabar berdi.
Bu yilgi g‘olib 52 yoshli vengr yozuvchi David Saley bo‘lib, u “Tana” (“Flesh”) nomli romani bilan adabiyot sohasidagi eng nufuzli mukofotni qo‘lga kiritdi. Bu haqda “Guardian” nashri xabar berdi.
“Tana” asari yozuvchining ijodiy yo‘lidagi oltinchi romani hisoblanadi. Unda Ishtvan ismli yosh venger yigitning hayoti orqali zamonaviy Yevropadagi ijtimoiy va madaniy muammolar yoritilgan.
Asarda qahramon harbiy xizmatni tamomlagach, vatanini tark etib Londonga yo‘l oladi. U yerda boy oilalarga xizmat ko‘rsatib, hayotda o‘z o‘rnini topishga harakat qiladi.
David Saley intervyusida “Tana” asarida inson tabiati, ish va qadriyatlar o‘rtasidagi murakkab aloqalarni ko‘rsatishga intilganini ta’kidladi. Uning so‘zlariga ko‘ra, roman zamonaviy Yevropani belgilab turgan iqtisodiy va madaniy tafovutlar haqida chuqur mulohaza qilishga undaydi.
Bu yilgi Buker mukofoti uchun qisqa ro‘yxatda boshqa mashhur yozuvchilar ham bor edi. Ular orasida amerikalik Benjamin Markovits (“The Rest of Our Lives”), Syuzan Choy (“Flashlight”), Keti Kitamura (“Audition”), britan yozuvchisi Endryu Miller (“The Land in Winter”) va hind adabiyotchisi Kiran Desai (“The Loneliness of Sonia and Sunny”) kabi nomzodlar ham ishtirok etdi.
David Saley 2016-yilda “All That Man Is” asari bilan Buker mukofotiga nomzod bo‘lgan, biroq o‘sha paytda g‘oliblikka erisha olmagandi. Shu bilan birga, bu yilgi g‘alaba uning ijodida yangi bosqichni boshlab berdi.
Buker mukofoti 1969-yildan buyon adabiyot sohasida eng nufuzli sovrinlardan biri sifatida tan olinadi. 2014-yildan boshlab bu mukofot Britaniyada chop etilgan har qanday ingliz tilidagi roman uchun berilishi mumkin.
G‘olibga 50 ming funt sterling (taxminan 57 ming yevro) miqdorida pul mukofoti topshiriladi. O‘tgan yili Buker mukofotini britan yozuvchisi Samanta Xarvi “Orbitada” nomli romani bilan qo‘lga kiritgan edi.
U o‘z asarida Xalqaro kosmik stansiyada yashayotgan astronavtlarning bir kunlik hayotini falsafiy va ta’sirli uslubda yoritgan. David Saleyning “Tana” nomli romani Yevropadagi ijtimoiy o‘zgarishlar, migratsiya va insoniy qadriyatlar mavzusida yangi muhokamalarga yo‘l ochdi.
Asar nafaqat adabiyot, balki jamiyatni chuqurroq anglash uchun ham muhim bo‘lib, keng e’tirofga sazovor bo‘ldi.
