Xitoylik boylar BAAga ko‘chmoqda: sabablar nimada?

So‘nggi yillarda xitoylik badavlat kishilar orasida o‘z hayoti yoki biznesini Birlashgan Arab Amirliklariga (BAA) ko‘chirish tendensiyasi sezilarli darajada oshmoqda. Bu haqda Zamin.uz xabar berdi.

Bu haqda Financial Times nashri xabar berdi. Ilgari Osiyoning eng boy odamlari Singapurni asosiy yo‘nalish sifatida tanlashardi.

Ammo hozirda Dubay va Abu-Dabi kabi Fors ko‘rfazi shaharlari ularning e’tiborini tortmoqda. Ekspertlarning fikriga ko‘ra, BAAda yashashni yoki biznes ochishni istagan xitoyliklar soni so‘nggi yillarda keskin ko‘paygan.

Ular nafaqat ko‘chib o‘tmoqda, balki mahalliy qonunlarga muvofiq oilaviy ofislar tashkil etib, mamlakat fuqaroligini olish imkoniyatini ham izlamoqda. BAA hukumatining ma’lumotlariga ko‘ra, 2022 yilda xorijlik investorlar uchun qariyb 80 mingta “oltin viza” berilgan.

Ushbu viza uzoq muddatli yashash huquqini taqdim etadi va mamlakatga investitsiya kiritgan shaxslar uchun mo‘ljallangan. M/HQ kompaniyasi rahbari Yan Mrazekning so‘zlariga ko‘ra, ko‘plab xitoylik oilalar Singapurdagi mulklarini sotib, sarmoyalarini BAAga yo‘naltirmoqda.

Uning fikricha, Xitoy va Singapurda joriy etilgan qat’iy karantin qoidalari xitoylik sarmoyadorlarni BAAga qiziqtirgan muhim omillardan biri bo‘lgan. Bugungi kunda Dubay nafaqat boylik va imkoniyatlar markazi, balki yangi hayot tarzi va moliyaviy erkinlik izlayotganlar uchun ham eng jozibali manzil bo‘lib qolmoqda.