Qozog‘istonda 2026 yil Ramazon 19 fevralda boshlanadi
Qozog‘iston Musulmonlari diniy boshqarmasi (QMDB) 2026 yil uchun asosiy diniy sanalar va bayramlar taqvimini e’lon qildi. Bu haqda Zamin.uz xabar berdi.
Bu haqda Tengrinews.kz xabar berdi. Unga ko‘ra, muqaddas Ramazon oyi 2026 yil 19 fevralda boshlanishi kutilmoqda.
Ramazon oyi musulmonlar uchun eng ulug‘ va qadrli oylardan biri hisoblanadi. Bu oyda musulmonlar ro‘za tutib, ibodat qiladi, xayr-ehsonlar qiladi va ruhiy poklanishga intiladi.
Qamariy taqvim bo‘yicha Ramazon 29 yoki 30 kun davom etadi. 2026 yilgi Ramazon 20 mart kuni Ramazon hayiti bilan yakunlanadi.
QMDB tomonidan ma’lum qilingan taqvimga ko‘ra, Qadr kechasi 16–17 mart kunlariga to‘g‘ri keladi. Ramazon hayiti 20 mart kuni, Qurbon hayiti esa 29 may kuni nishonlanishi rejalashtirilgan.
Diniy boshqarma bu sanalar xalqaro astronomik markazlar hisob-kitoblari asosida belgilanganini ta’kidladi. Shuningdek, yangi oy ko‘rinishiga qarab sanalarda kichik o‘zgarishlar bo‘lishi mumkinligi ham qayd etilgan.
O‘zbekistonda esa diniy sanalar va bayramlar musulmonlar idorasi tomonidan hilol kuzatuvlariga asoslanib aniqlanadi. Shu sababli, Qozog‘iston e’lon qilgan taqvim O‘zbekiston taqvimidan farq qilishi ehtimoldan xoli emas.
