Islomobodda sud yaqinida portlash: 6 kishi halok bo‘ldi
Pokiston poytaxti Islomobodda sud binosi hududida kuchli portlash sodir bo‘ldi. Bu haqda Zamin.uz xabar berdi.
Hodisa natijasida kamida 6 kishi halok bo‘ldi, yana 12 nafar fuqaro jarohat oldi. Bu haqda mahalliy politsiya boshqarmasi ma’lum qildi.
Portlash yuz bergan joyga tez yordam va qutqaruv xizmatlari darhol yetib borgan. Jabrlanganlar yaqin atrofdagi shifoxonalarga olib ketilgan.
Voqea sabablarini o‘rganish maqsadida xavfsizlik kuchlari hududni to‘liq yopib, tergov ishlarini boshlagan. Dastlabki ma’lumotlarga ko‘ra, portlash sud binosi yonida to‘xtab turgan avtomobilda yuz bergan bo‘lishi mumkin.
Samaa TV telekanalining xabariga ko‘ra, portlash manbai aynan shu transport vositasi bo‘lgani tasdiqlangan. Geo TV manbalari esa hodisani terrorchilik hujumi bo‘lishi ehtimolini bildirgan.
Pokiston hukumati voqea sabablarini aniqlash uchun maxsus komissiya tuzgan. Shu bilan birga, mamlakat bo‘ylab xavfsizlik choralari kuchaytirilgan.
Hozircha hech bir guruh portlash uchun mas’uliyatni o‘z zimmasiga olmagan. Tergov davom etmoqda.
