Islomoboddagi portlashda 12 kishi halok bo‘ldi
Islomobod shahrida joylashgan tuman sudi binosi yaqinida mahalliy vaqt bilan soat 12:39 da portlash sodir bo‘ldi. Bu haqda Zamin.uz xabar berdi.
Hodisa natijasida 12 kishi halok bo‘ldi, 27 kishi turli darajadagi jarohatlar oldi. Bu haqda BBC axborot agentligi xabar berdi.
Ichki ishlar vaziri Mohsin Naqvining ma’lumotiga ko‘ra, hujumchi sud majmuasiga kirishni rejalashtirgan, biroq politsiya avtomobili yonida portlovchi moslamani faollashtirishga majbur bo‘lgan. Ushbu terakt Pokiston Prezidenti Asif Ali Zardari tomonidan qattiq qoralandi.
Voqea guvohlaridan biri, advokat Rustam Malikning so‘zlariga ko‘ra, portlash paytida sud binosi yaqinida bo‘lgan odamlar va advokatlar xavfsiz joyga qochishga uringan. U o‘zining avtomobilini sud binosi yaqinida to‘xtatayotganida portlash sodir bo‘lganini aytdi.
Hodisa joyida yonib ketgan avtomobillar va umumiy tartibsizlik holati kuzatilgan. Guvohlarning aytishicha, odamlar hayotini saqlab qolish uchun vahimaga tushib, qochishga harakat qilgan.
Shu bilan birga, xavfsizlik choralarining kuchaytirilgani va voqea joyida tekshiruv ishlari olib borilayotgani ma’lum qilindi.
