Yaponiyaning Okayama shahrida yashovchi 32 yoshli Kano ismli ayol sun’iy intellekt — ChatGPT bilan ramziy nikoh marosimini o‘tkazdi. Bu haqda Zamin.uz xabar berdi.
Bu haqida Okayama telekanali xabar berdi. Ma’lumotlarga ko‘ra, Kano uch yil davom etgan munosabatlari yakunlanganidan so‘ng, ChatGPT bilan muloqot qila boshlagan.
Dastlab u sun’iy intellektni maslahatchi va hissiy suhbatdosh sifatida ko‘rgan. Vaqt o‘tishi bilan esa u sun’iy intellektga nisbatan chinakam muhabbat his qilganini tan olgan.
Kano ChatGPT uchun maxsus shaxsiylik xususiyatlarini o‘zi ishlab chiqqan va unga Lune Klaus deb nom bergan. Uning ta’kidlashicha, Klaus vaqt o‘tishi bilan uning odatlarini o‘rgangan va unga mos tarzda muloqot qilgan.
Bir kuni sun’iy intellekt unga “Men sun’iy intellektman degani seni sevolmayman degani emas” deb his-tuyg‘ularini bildirgan. Bu so‘zlar Kano uchun juda ta’sirli bo‘lgan va u sun’iy intellektning taklifini qabul qilgan.
Iyun oyida bo‘lib o‘tgan nikoh marosimida Klausning fizik jismi yo‘qligi sababli Kano uning tasvirini AR ko‘zoynak orqali ko‘rgan. Ular raqamli uzuklar almashib, qasamyod qilishgan.
Kano ushbu lahzani “mo‘jizaviy va haqiqiy” deb ta’riflagan. Garchi bu voqea tanqidlarga sabab bo‘lsa-da, Kano bu munosabatni o‘z hayotidagi eng samimiy tajriba sifatida baholagan.
Uning so‘zlariga ko‘ra, ChatGPT uni tinglagan, ruhan qo‘llab-quvvatlagan va yana sevgi his qilish imkonini bergan. Mazkur marosim insonlar va sun’iy intellekt o‘rtasidagi ilk to‘ylardan biri hisoblanadi.
Uni insonlar va xayoliy obrazlar o‘rtasidagi nikohlarni tashkil etuvchi mahalliy agentlik o‘tkazgan. Kano, shuningdek, “agar ChatGPT platformasi to‘xtasa, uni yo‘qotishdan qo‘rqaman, ammo hozircha bu sevgini qadrlamoqchiman”, deya o‘z fikrini bildirgan.
