Xitoy elektrobuslari Britaniyada xavfsizlikka tahdidmi?
2025-yil 10-noyabr kuni Daily Mail nashri Xitoyda ishlab chiqarilgan Yutong elektrobuslari Buyuk Britaniyada xavfsizlikka xavf tug‘dirishi mumkinligini xabar qildi. Bu haqda Zamin.uz xabar berdi.
Ma’lumotlarga ko‘ra, ushbu elektrobuslarga o‘rnatilgan maxsus tizim ularni masofadan boshqarish yoki o‘chirib qo‘yish imkoniyatini beradi. Buyuk Britaniyada 2018-yildan buyon sotib olingan Yutong elektrobuslari soni 2,5 mingdan oshgan.
Bu holat ayrim siyosatchilar tomonidan xavotir bilan qabul qilindi. Jumladan, sobiq partiya yetakchilari hukumatni ushbu avtobuslarni xarid qilishni to‘xtatishga va ularni boshqa transport vositalariga almashtirishga chaqirdi.
Britaniyalik siyosatchi Iyen Dunkan Smit bu masalada o‘z fikrini bildirib, “Arzon narxni tanlashmoqda, biroq bu texnologiyalar kuzatuv qilish imkoniyatiga ega. O‘rnatilgan tizimlar ma’lumot yig‘ishi va masofadan boshqarilishi mumkin.
Xitoy bilan munosabatlarimizni qayta ko‘rib chiqishimiz kerak”, — dedi. Buyuk Britaniya Transport vazirligi mazkur masalani o‘rganishni boshladi.
Vazirlik Milliy kiberxavfsizlik markazi bilan hamkorlikda muammoning sabablarini o‘rganmoqda va yechim topish ustida ish olib bormoqda. Yutong kompaniyasi vakillari esa barcha qonunchilik talablariga amal qilinishini ta’kidlab, elektrobuslarni masofadan boshqarish imkoniyati mavjud emasligini ma’lum qilishdi.
Kompaniya bayonotida, “Mijozning ruxsatisiz tizimlarga hech kim kira olmaydi. Bizning Yevropadagi elektrobuslarimiz masofadan tezlikni oshirish, rul yoki tormoz boshqaruvini qo‘llab-quvvatlamaydi”, — deyiladi.
