Eronda sportchi ayol ro‘molsiz harakati uchun hibsga olindi
Eronda ayol sport murabbiyi Xaniya Shariati Rudposhti jamoat oldida ro‘molsiz akrobatik harakatlar namoyish qilgani uchun qo‘lga olingani haqida xabar berildi. Bu haqda Zamin.uz xabar berdi.
Mahalliy manbalarga ko‘ra, u majburiy hijob qonunlarini buzgani sababli hibsga olingan. Norvegiyada joylashgan "Hengau" inson huquqlari tashkilotining ma’lum qilishicha, sportchi 9-noyabr kuni kechqurun ushlangan va oilasi bilan faqat bir marta telefon orqali gaplashishga ruxsat berilgan.
Hozirda Xaniya Shariatining qayerda saqlanayotgani noma’lum. Shu bilan birga, uning ijtimoiy tarmoqlardagi sahifalari, jumladan, 160 mingdan ortiq obunachiga ega Instagram akkaunti Eron xavfsizlik xizmati tomonidan nazorat qilinayotgani xabar qilingan.
So‘nggi paytlarda Eron hukumati jamoat joylarida kiyinish qoidalariga qat’iy rioya qilishni talab qilmoqda. Mamlakat bosh prokurori Muhammad Muvahhidi Ozod islomiy me’yorlarga amal qilish har bir ayolning diniy burchi ekanini ta’kidlab, qonun buzilishlariga nisbatan jazo choralari kuchaytirilishini bildirgan.
Hijob masalasi Eronda uzoq yillardan beri bahslarga sabab bo‘lib kelmoqda. Xaniya Shariatining hibsga olinishi ushbu masala bo‘yicha mamlakatda davom etayotgan tortishuvlarni yana bir bor jonlantirdi.
