Eronda murabbiy ro‘molsiz harakati uchun hibsga olindi
Eronda taniqli sport murabbiyi Xaniya Shariati Rudposhti jamoat oldida ro‘molsiz holda gimnastik harakatlar namoyish etgani uchun hibsga olindi. Bu haqda Zamin.uz xabar berdi.
Bu haqda “Iran International” xabar bermoqda. Ma’lum qilinishicha, ushbu voqea ommaviy kiyinish qoidalariga zid keluvchi chiqish ortidan sodir bo‘lgan.
Sportchi mahalliy aholi oldida boshini yopmagan holda gimnastik harakatlar bajargani uchun “islomiy me’yorlarni buzgan” deb topilgan. Norvegiyada joylashgan Hengau inson huquqlari tashkiloti xabariga ko‘ra, Shariati 9-noyabr kuni kechqurun xavfsizlik xizmatlari tomonidan qo‘lga olingan.
U oilasi bilan faqat qisqa telefon orqali muloqot qilishga ruxsat olgan, biroq uning ayni damda qayerda ekanligi haqida aniq ma’lumot yo‘q. Shariatining ijtimoiy tarmoqlardagi sahifalari, jumladan, 160 mingdan oshiq obunachiga ega bo‘lgan Instagram akkaunti xavfsizlik idoralari tomonidan nazorat qilinmoqda.
Eron hukumatining yuqori darajadagi vakillari so‘nggi kunlarda jamoat joylarida kiyinish qoidalariga rioya qilishni ta’minlash uchun keskin chora-tadbirlar ko‘rish zarurligini ta’kidlamoqda. Eron bosh prokurori Muhammad Muvahhidi Ozodning aytishicha, “islomiy kiyinish” talablariga amal qilish nafaqat qonuniy majburiyat, balki diniy burch sifatida ham qaraladi.
Eron qonunchiligiga ko‘ra, ayollar ommaviy joylarda boshlarini yopib yurishlari shart. Biroq ayrim inson huquqlari faollari bu talabni shaxsiy erkinlikka qarshi cheklov deb baholamoqda.
Mazkur voqea mamlakatda kiyinish va shaxsiy erkinlik bilan bog‘liq masalalarning yana dolzarb bo‘lib qolganini ko‘rsatmoqda.
