Damashq shahrining markazida joylashgan Suriya Milliy muzeyida o‘g‘irlik sodir bo‘lgani haqida Singapurning Lianhe Zaobao nashri xabar berdi. Bu haqda Zamin.uz xabar berdi.
Ma’lumotlarga ko‘ra, 10-noyabr kuni kechqurun noma’lum shaxslar muzey binosiga noqonuniy ravishda kirib, qadimiy Rim davriga tegishli haykallar va boshqa qimmatbaho yodgorliklarni o‘g‘irlab ketishgan. Hodisa davomida jinoyatchilar bir nechta shisha tokchalarni sindirishgan.
Damashq ichki xavfsizlik boshqarmasi vakillari jinoyatchilarni qo‘lga olish hamda o‘g‘irlangan buyumlarni qaytarish uchun barcha zarur choralar ko‘rilayotganini ma’lum qildi. Nashrga ko‘ra, muzeydan jami oltita qadimiy haykal o‘g‘irlangan.
Suriya Milliy muzeyi 1936 yilda tashkil etilgan bo‘lib, arab dunyosidagi eng yirik madaniy markazlardan biri hisoblanadi. Fuqarolar urushi davrida, 2012 yilda, muzey faoliyati to‘xtatilgan edi.
Keyinchalik, 2018 yilda muzey qisman ochilgan bo‘lsa, 2025 yil yanvar oyida u to‘liq faoliyatini tikladi. Mazkur muzeyning tarixiy va madaniy ahamiyati katta bo‘lib, uning xavfsizligi masalasi dolzarb bo‘lib qolmoqda.
