Gruziyada turk harbiy samolyoti qulab, 18 kishi halok bo‘ldi
Gruziyada Turkiya harbiy havo kuchlariga tegishli C-130 harbiy samolyotining qulashi mintaqada katta rezonans keltirib chiqardi. Bu haqda Zamin.uz xabar berdi.
Mamlakat Ichki ishlar vaziri Gela Geladzening ma’lum qilishicha, halokat joyidan 18 nafar harbiy xizmatchining jasadi topilgan, yana ikki nafarini qidirish ishlari davom etmoqda. “Samolyot bortida jami 20 kishi bo‘lgan.
Hozirda 18 nafarining jasadi topildi, qolgan ikki nafarini qidiryapmiz. Biz turk hamkasblarimiz bilan yaqin hamkorlikda ishlamoqdamiz”, — dedi Geladze o‘z bayonotida.
Halokat Sighnaghi munitsipaliteti hududida, Gruziya va Turkiya chegarasidan taxminan 5 kilometr uzoqlikda sodir bo‘lgani aytilmoqda. Ma’lumotlarga ko‘ra, samolyot bortida bo‘lgan harbiylar Turkiyaning rasmiy delegatsiyasi tarkibida bo‘lgan.
Gruziya huquqni muhofaza qilish organlari ushbu voqea yuzasidan “havo transporti xavfsizligi qoidalarini buzish natijasida insonlar o‘limiga sabab bo‘lish” moddasi bo‘yicha jinoyat ishi ochgan. Halokatning aniq sabablari hozircha noma’lum, biroq ayrim manbalarda havo sharoitining yomonligi va texnik nosozlik ehtimoli tilga olinmoqda.
Gruziya va Turkiya rasmiylaridan iborat qo‘shma komissiya hodisani o‘rganishni boshlagan. Bu voqea oxirgi yillarda mintaqadagi eng yirik harbiy aviahalokatlardan biri sifatida qayd etilmoqda.
