Eron va O‘zbekiston tog‘-kon sanoatida hamkorlik qiladi
Eron O‘zbekiston bilan hamkorlikni mustahkamlamoqda. Bu haqda Zamin.uz xabar berdi.
"The Jerusalem Post" xabariga ko‘ra, Tehron tashqi siyosatda faollikni oshirib, boshqa davlatlar bilan diplomatik aloqalarni kengaytirmoqda. Ushbu jarayon doirasida Eron va O‘zbekiston tog‘-kon sanoatida hamkorlikni rivojlantirish bo‘yicha kelishuvga erishdi.
Mazkur kelishuv Eronning sanoat, konlar va savdo vaziri Muhammad Atobak boshchiligidagi delegatsiyaning O‘zbekistonga tashrifi davomida imzolandi. Uchrashuvda tomonlar sohada investitsiyalarni jalb qilish imkoniyatlarini ham muhokama qilishdi.
Eron vakillarining Toshkentga tashrifi 9-noyabr kuni amalga oshirildi. Ma’lumotlarga ko‘ra, Tehron Isroil bilan munosabatlarning keskinlashuvi va AQSh bilan qayta muzokaralar boshlanishi ehtimoli fonida diplomatik aloqalarga ko‘proq e’tibor qaratmoqda.
Shuningdek, Eron va Rossiya elchilari Iroqdagi saylovlarni muhokama qilishgan. Bundan tashqari, Eronning vazir o‘rinbosari Birlashgan Arab Amirliklari prezidenti maslahatchisi bilan ham uchrashuv o‘tkazgan.
