Fransiya Durovga qo‘yilgan barcha cheklovlarni bekor qildi
Fransiyada bir necha oydan buyon davom etayotgan huquqiy jarayonlar muhim bosqichga yetdi. Bu haqda Zamin.uz xabar berdi.
Bloomberg nashriga ko‘ra, Telegram asoschisi Pavel Durovga nisbatan qo‘llanilgan cheklovlar 10-noyabrdan boshlab to‘liq bekor qilindi. Ushbu qaror natijasida Durovga Fransiyani tark etish bo‘yicha ilgari qo‘yilgan taqiq va politsiyaga majburiy ravishda borib qayddan o‘tish talabi bekor qilindi.
Endilikda u mamlakatni sud organlarini oldindan xabardor qilmasdan erkin tark etishi mumkin. AFP manbasiga ko‘ra, Durov sud nazorati talablariga to‘liq rioya qilgani bois cheklovlar bekor qilingan.
Ushbu cheklovlar Telegram platformasi faoliyati bilan bog‘liq tergov doirasida joriy etilgan edi. Tergovchilar platformani noqonuniy kontent tarqatilishiga sharoit yaratish, jinoiy guruhlar faoliyatini muvofiqlashtirish va moderatsiya qoidalariga to‘liq rioya qilmaslikda gumon qilgan.
Hozirda tergov jarayoni rasman tugamagan bo‘lsa-da, cheklovlarning bekor qilinishi yangi dinamikani ko‘rsatmoqda. Eslatib o‘tamiz, 2025-yil boshida Durovga nisbatan sud nazorati kuchaytirilgan, Fransiyani tark etish taqiqlangan va politsiyaga muntazam borib qayddan o‘tish majburiyati yuklatilgan edi.
Yoz oylarida bu choralar biroz yumshatilgan bo‘lsa-da, to‘liq erkinlik berilmagandi. Endi esa barcha cheklovlar bekor qilindi.
Hozircha Durov yoki Fransiya rasmiylari bu qaror yuzasidan ommaviy bayonot bermagan. Taxlilchilarga ko‘ra, qaror tergov jarayonidagi yangi ma’lumotlar yoki dalillar bilan bog‘liq bo‘lishi mumkin.
Voqea Yevropada raqamli xavfsizlik, platformalar mas’uliyati va internet erkinligi mavzusidagi global bahslarga yana e’tibor qaratishga sabab bo‘ldi. Rasmiy izohlar kutilmoqda.
