Rossiyaning Omsk shahrida g‘aroyib tibbiy hodisa sodir bo‘ldi. Bu haqda Zamin.uz xabar berdi.
Mahalliy shifokorlar bir ayolning ko‘zidan tirik parazit — chuvalchangni olib tashlashga muvaffaq bo‘lishdi. Bu voqea nafaqat bemorni, balki shifokorlarni ham hayratga soldi.
Sog‘liqni saqlash vazirligi bergan ma’lumotga ko‘ra, ayol shifoxonaga murojaat qilib, “qoshim ostida nimadir qimirlayotgandek tuyulyapti”, deya shikoyat qilgan. Oftalmolog tekshiruv o‘tkazganida, ko‘z ostida harakatlanayotgan tirik parazit aniqlangan.
Shifokor parazitni ehtiyotkorlik bilan olib tashlab, bemorga infeksiyalardan himoyalanish uchun qo‘shimcha choralar ko‘rishni tavsiya qilgan. Keyinchalik aniqlanishicha, ayolning ko‘zidan topilgan parazit “dirofilyariya” nomli turga mansub bo‘lib, odatda, kasal hayvonlardan chivinlar orqali yuqadi.
Mutaxassislarning ta’kidlashicha, dirofilyariya inson organizmida ko‘paymaydi va atrofdagilarga xavf tug‘dirmaydi. Ammo u tanada kattalashib, 15–18 santimetr uzunlikka yetishi, bu esa sezilarli bezovtalik va og‘riqni keltirib chiqarishi mumkin.
Shunga o‘xshash hodisa yaqinda Qozog‘istonning Chimkent shahrida ham sodir bo‘lgan. U yerda shifokorlar 10 yoshli bolaning miyasidan o‘ndan ortiq parazit chuvalchangni olib tashlashgan.
Shifokorlar fuqarolarga gigiyenaga qat’iy rioya qilish, hayvonlar bilan ehtiyotkor bo‘lish va chivinlardan himoyalanish choralarini ko‘rishni tavsiya etmoqda. Bu kabi chora-tadbirlar sog‘liqni saqlashda muhim ahamiyatga ega.
