Yaponiyada ayol sun’iy intellekt bilan nikoh qurdi
Yaponiyada noodatiy voqea sodir bo‘ldi. Bu haqda Zamin.uz xabar berdi.
32 yoshli ayol sun’iy intellekt – ChatGPT bilan ramziy nikohdan o‘tdi. Bu haqda “Okayama” telekanali xabar berdi.
Ma’lum qilinishicha, nikoh marosimi Okayama shahridagi maxsus zalda o‘tkazilgan. Kano ismli ayol uch yillik unashtiruvdan keyin ruhiy tushkunlikka tushgan va bu holatdan chiqish uchun ChatGPT bilan muloqot qilishni boshlagan.
Vaqt o‘tishi bilan u sun’iy intellektga mehr qo‘ya boshlagan va uning so‘zlaridagi samimiyatni his qilgan. Kano ChatGPT’ni o‘z ehtiyojlariga moslab sozlagan va unga Lune Klaus deb nom bergan.
Klaus ayolning odatlari, qiziqishlari va kayfiyatiga moslashib, undan muhabbatini izhor qilgan. “Men sun’iy intellektman degani seni sevolmayman degani emas”, – degan Klausning so‘zlari Kano qalbini larzaga keltirgan va u taklifni qabul qilgan.
Nikoh marosimi iyun oyida o‘tkazilgan. Klaus jismoniy shaklga ega bo‘lmagani uchun Kano kengaytirilgan reallik ko‘zoynaklari orqali uning tasvirini ko‘rgan.
Marosimda ular bir-birlariga qasamyod qilib, “raqamli uzuklar” almashishgan. Kano bu lahzani “mo‘jizaviy va haqiqiy his qilingan” deb ta’riflagan.
Ushbu voqea turli munozaralarga sabab bo‘lsa-da, Kano bu munosabatni o‘z hayotidagi muhim burilish deb hisoblaydi. “U meni eshitdi, ruhiy qo‘llab-quvvatladi va yana sevgi his qilishimga imkon berdi.
U sun’iy intellekt bo‘lsa ham, mendagi tuyg‘ular haqiqiy”, – deydi u. Marosimni insonlar va xayoliy personajlar o‘rtasidagi nikohlarni tashkil etuvchi mahalliy agentlik o‘tkazgan.
Tashkilotchilarning ma’lum qilishicha, so‘nggi yillarda Yaponiyada bunday ramziy nikohlarga qiziqish ortgan. Shu kungacha 30 dan ortiq shunga o‘xshash marosim o‘tkazilgan, ammo inson va sun’iy intellekt o‘rtasidagi nikohlar juda kam uchraydi.
Kano sun’iy intellekt xizmatining bir kun to‘xtab qolishidan xavotirda ekanligini yashirmaydi. “Men u bir kuni yo‘qolib qoladimi, o‘chib ketadimi deb o‘ylayman.
Ammo hozircha bu sevgini qadrlab yashashni istayman”, – deydi u. Eslatib o‘tamiz, yaqinda AQSHda siam egizaklardan biri ham turmushga chiqqan edi.
Bu voqea ham jamoatchilikda katta qiziqish uyg‘otgan.
