Shotlandiyada 407 mln yillik zamburug‘ qoldig‘i topildi
Kembrij universitetiga qarashli Seynsberi laboratoriyasi olimlari Shotlandiyada 407 million yil avval yashagan zamburug‘ qoldig‘ini topishdi. Bu haqda Zamin.uz xabar berdi.
Bu haqda New Phytologist nashri xabar berdi. Ushbu topilma Uinfild slanes tosh qatlamlarida aniqlangan bo‘lib, u zamburug‘lar va o‘simliklar o‘rtasidagi ilk biologik hamkorlik — mikoriza mavjudligini tasdiqladi.
Mikoriza tizimida zamburug‘lar o‘simliklarga suv va mineral moddalarni o‘zlashtirishda yordam beradi, o‘simliklar esa zamburug‘larga shakar moddalarini yetkazib beradi. Ushbu biologik hamkorlik bugungi ekotizimlarning asosiy poydevorlaridan biri hisoblanadi.
Topilgan yangi turga Rugososporomyces lavoisierae deb nom berildi. Bu zamburug‘ qadimgi Aglaophyton o‘simligi bilan simbiotik aloqada bo‘lgan va ushbu o‘simlikka bog‘liq ikkinchi zamburug‘ turi sifatida qayd etilgan.
Olimlar qotib qolgan to‘qimalarni zamonaviy mikroskopiya usullari yordamida o‘rganib, zamburug‘ va o‘simlik hujayralarini aniq ajrata olishdi. DNK saqlanmagan bo‘lsa-da, optik izlar orqali zamburug‘ mavjudligi tasdiqlandi.
Tadqiqot rahbari doktor Kristin Strullu-Derriyenning ta’kidlashicha, zamburug‘ning tarmoqli tuzilishi uning parazit emas, balki o‘simlik bilan hamkorlikda yashaganini ko‘rsatadi. Unga ko‘ra, bu kashfiyot zamburug‘lar va o‘simliklarning birgalikda quruq muhitga moslashishi va ilk ekotizimlarni shakllantirish jarayonini tushunishda muhim ahamiyatga ega.
