Janubiy Koreya haqoratli blogerlarga qarshi choralar ko‘radi
Janubiy Koreya hukumati mamlakat haqidagi noto‘g‘ri yoki haqoratli ma’lumotlarni tarqatayotgan chet ellik blogerlarga nisbatan cheklovlar joriy etishni rejalashtirmoqda. Bu haqda Zamin.uz xabar berdi.
Bu haqda “The Korea Times” nashri xabar berdi. Ma’lum bo‘lishicha, Vazirlar Mahkamasi yig‘ilishida Adliya vaziri Chun Son Xo bu masalani ko‘targan va bunday blogerlarning mamlakatga kirishini taqiqlashni taklif qilgan.
Uning so‘zlariga ko‘ra, ushbu chora Koreyaning xalqaro obro‘sini himoya qilishga qaratilgan. Vazirning ta’kidlashicha, Janubiy Koreyaga nisbatan nafrat yoki haqorat targ‘ib qilayotgan chet elliklarning kirishini cheklash bo‘yicha ishlar olib borilmoqda.
Avvalroq bunday videolar “klikbeyt” sifatida qabul qilinardi, biroq yangi qoidalar kuchga kirgan taqdirda, ular jiddiy oqibatlarga olib kelishi mumkin. Bunday blogerlar nafaqat mamlakatga kirish huquqidan mahrum etilishi, balki tergovga ham tortilishi ehtimol qilinmoqda.
Mazkur tashabbus bir necha mojarolar ortidan ilgari surilgan. Masalan, amerikalik strimer Jonni Somali jamoat tartibini buzgan videosi tufayli tergovga chaqirilgan bo‘lsa, yaponiyalik bloger Debo-chan soxta ma’lumot tarqatgani uchun tanqidga uchragan edi.
Mutasaddilar fikricha, yangi tizim Koreya madaniyati va jamiyatini asossiz ravishda tahqirlovchi kontentga qarshi samarali chora bo‘ladi. Bu orqali mamlakatning xalqaro imiji mustahkamlanishi kutilmoqda.
