Xitoyda eng yirik oltin koni aniqlandi
Xitoyning shimoli-sharqidagi Lyaonin provinsiyasida mamlakat tarixidagi eng yirik oltin koni aniqlandi. Bu haqda Zamin.uz xabar berdi.
Bu haqda Xitoy Tabiiy resurslar vazirligi o‘zining rasmiy manbalarida xabar berdi. Mutaxassislarning tadqiqotlariga ko‘ra, Dadonggou deb nomlangan bu konning oltin zahiralari 1440 tonnaga teng.
Ushbu miqdor Xitoyda ilgari aniqlangan konlardan sezilarli darajada katta bo‘lib, mamlakatning oltin qazib olish imkoniyatlarini yangi bosqichga olib chiqishga xizmat qiladi. Ma’lumotlarga ko‘ra, kon tarkibidagi oltin miqdori har bir tonna ruda uchun 0,56 grammni tashkil etadi.
Ruda tanasining uzunligi 3100 metr, chuqurligi esa 115 metrdan 913 metrgacha o‘zgaradi. O‘rtacha qalinlik 263 metr bo‘lsa, maksimal qalinlik 513 metrgacha yetadi.
Vazirlikning ta’kidlashicha, bu konning kashf etilishi Xitoyning strategik oltin zahiralarini oshirishga xizmat qiladi. Bundan tashqari, u Lyaonin provinsiyasida jahon darajasidagi oltin qazib olish markazini shakllantirishga zamin yaratadi.
Bu loyiha mamlakat iqtisodiyotining rivojlanishida muhim ahamiyat kasb etadi.
