Xitoy oltin zaxiralarini oshirib, narxni ko‘tarmoqda
Xitoy yashirin ravishda oltin zaxiralarini oshirmoqda va bu jarayon qimmatbaho metalning narxi oshishiga sabab bo‘lmoqda. Bu haqda Zamin.uz xabar berdi.
Financial Times xabariga ko‘ra, Xitoyning oltin sotib olish hajmi rasmiy hisobotlarda ko‘rsatilganidan bir necha barobar ko‘p bo‘lishi mumkin. Ma’lumotlarga ko‘ra, Xitoy Markaziy banki avgust oyida 1,9 tonna, iyulda 1,9 tonna, iyun oyida esa 2,2 tonna oltin xarid qilgan.
Biroq tahlilchilar bu raqamlar aniq emasligini, aslida sotib olish hajmi ancha yuqori ekanini ta’kidlashmoqda. Société Générale hisob-kitoblariga ko‘ra, Xitoyning 2023 yildagi umumiy oltin xaridi 250 tonnaga yetishi mumkin.
Bu ko‘rsatkich dunyo markaziy banklarining umumiy talabining uchdan bir qismiga tengdir. Financial Times ma’lumotlariga ko‘ra, Xitoy ushbu harakatlar orqali o‘z zaxiralarini diversifikatsiya qilishni va AQSh dollariga qaramlikni kamaytirishni maqsad qilgan.
Bu strategiya mamlakat iqtisodiy mustaqilligini oshirishga qaratilgan.
