Jahon sog‘liqni saqlash tashkiloti (JSST)ning yangi hisobotiga ko‘ra, so‘nggi 30 yilda dunyoda diabetga chalinganlar soni keskin oshib, 828 million kishiga yetgan. Bu haqda Zamin.uz xabar berdi.
Ushbu o‘sish xavotirli holat sifatida baholanyapti. Ma’lumotlarga ko‘ra, 30 yoshdan oshgan kattalarning yarmidan ko‘pi zarur tibbiy yordamni ololmayapti.
Diabet eng ko‘p qayd etilgan davlatlar orasida Hindiston (212 million bemor), Xitoy (148 million), AQSH (42 million), Pokiston (36 million), Indoneziya (25 million) va Braziliya (22 million) yetakchilik qilmoqda. JSST Jahon diabet kunida "Hayot davomidagi diabet" mavzusini ilgari surib, kasallik bilan yashayotgan har bir inson to‘liq tibbiy yordam, qo‘llab-quvvatlovchi muhit va sog‘lom hayot tarzini rag‘batlantiruvchi siyosatlarga muhtoj ekanini ta’kidladi.
Tashkilotning fikricha, diabetning oldini olish va uni nazorat qilishda uzluksiz yondashuv zarur. 2022 yilda JSST a’zo davlatlar uchun 2030 yilgacha bajarilishi lozim bo‘lgan beshta asosiy maqsadni belgiladi.
Ular quyidagilardan iborat: 1. Diabetga chalinganlarning 80 foizini aniqlash.
2. Qon shakarini barqaror nazorat qilayotganlar sonini 80 foizga yetkazish.
3. Qon bosimini nazorat qilayotgan bemorlar ulushini 80 foizga ko‘tarish.
4. 40 yoshdan oshgan diabetga chalinganlarning kamida 60 foiziga statin dorilari tavsiya etilishi.
5. Birinchi tur diabetga chalinganlarning barchasiga arzon insulin va o‘z-o‘zini nazorat qilish vositalarini taqdim etish.
Mutaxassislar bu ko‘rsatkichlarni inson salomatligi uchun jiddiy ogohlantirish sifatida baholamoqda. Diabetning oldini olish va uni nazorat qilishda sog‘lom turmush tarzini targ‘ib etish muhim ahamiyatga ega.
