Sibir suvlarini Markaziy Osiyoga yo‘naltirish rejalari ko‘rib chiqilmoqda
Rossiya Fanlar akademiyasi olimlari Sibirning yirik daryolaridan biri bo‘lgan Ob daryosi suvini Markaziy Osiyo hududlariga yo‘naltirish masalasini yana muhokama qilishni boshladi. Bu haqda Zamin.uz xabar berdi.
Ushbu g‘oya ilgari Sovet Ittifoqi davrida “Burilish” loyihasi sifatida taklif qilingan, biroq o‘sha paytda amalga oshirilmagan edi. Hozirda mutaxassislar mazkur rejani zamonaviy texnologiyalar yordamida qayta ko‘rib chiqishmoqda.
Loyihaga ko‘ra, Sibir suvlarini maxsus yopiq plastik quvurlar orqali 2100 kilometr masofaga uzatish rejalashtirilgan. Bu suv Qozog‘iston va O‘zbekiston hududlariga yetkazib berilishi mumkin.
Mutaxassislarning ta’kidlashicha, loyiha amaliy jihatdan turli tomonlama o‘rganilmoqda. Muhandislik imkoniyatlari, texnik ko‘rsatkichlar va ekologik ta’sirlar chuqur tahlil qilinmoqda.
Agar loyiha amalga oshsa, bu Orolbo‘yi mintaqasidagi suv tanqisligini yumshatishga yordam berishi mumkin. Hozircha ushbu masala yuzasidan yakuniy qaror qabul qilinmagan bo‘lsa-da, Sibir suvlarini Markaziy Osiyoga yo‘naltirish g‘oyasi yana jamoatchilik e’tiborida turibdi.
