Kashmirdagi portlash: 9 kishi halok, 29 jarohatlandi
14-noyabr kuni kechqurun Jammu va Kashmirning Novgama hududida joylashgan politsiya bo‘limida kuchli portlash sodir bo‘ldi. Bu haqda Zamin.uz xabar berdi.
NDTV xabariga ko‘ra, mazkur hodisa oqibatida 9 nafar fuqaro halok bo‘ldi, 29 kishi esa turli darajadagi jarohatlar bilan shifoxonaga yetkazildi. Portlash politsiya va mutaxassislar tomonidan musodara qilingan portlovchi moddalarni o‘rganish jarayonida sodir bo‘lgani ma’lum qilindi.
Jarohatlanganlar Hindiston armiyasining 92-gospitaliga hamda Sher-i-Kashmir tibbiyot institutiga joylashtirildi. Halok bo‘lganlarning ko‘pchiligi politsiya xodimlari va kriminalistika bo‘yicha mutaxassislardir.
Shuningdek, Srinagar ma’muriyatining ikki vakili ham halok bo‘lgani qayd etildi. Portlashdan avval politsiya “Jaysh-e-Muhammad” guruhiga tegishli materiallarni topib, tekshiruv o‘tkazgan va katta miqdorda portlovchi moddalarni musodara qilgan edi.
Ushbu guruhga aloqador bir nechta shaxs qo‘lga olingan. So‘nggi kunlarda mintaqada vaziyat keskinlashmoqda.
Yaqinda Dehlida sodir bo‘lgan avtomobil portlashi oqibatida 8 kishi halok bo‘ldi, 24 kishi jarohat oldi. Shuningdek, Islomobodda yuz bergan avtohujumda kamida 12 kishi halok bo‘ldi.
Bu kabi hodisalar mintaqadagi xavfsizlik masalalarini yanada dolzarblashtirmoqda.
