Yuriy Dud bir yil-u o‘n oyga hukm qilindi

Yuriy Dud sirtdan bir yil va o‘n oy muddatga umumiy tartibli koloniyaga hukm qilindi. Bu haqda Zamin.uz xabar berdi.

Sud uning xorijiy agent sifatidagi faoliyatini belgilangan tartibda bajarishdan bo‘yin tovlaganligini aniqladi. Bu haqda "TASS" axborot agentligi xabar berdi.

Jurnalistga nisbatan Moskva prokuraturasi tashabbusi bilan Rossiya Jinoyat kodeksining 330.1-moddasi bo‘yicha jinoiy ish ochilgan edi. Ma’lum qilinishicha, Yuriy Dud bir yil davomida ikki marta xorijiy agent belgisi qo‘yilmagan materiallarni tarqatgani uchun ma’muriy javobgarlikka tortilgan.

Eslatib o‘tamiz, Rossiya Adliya vazirligi Yuriy Dudni 2022 yil iyul oyida xorijiy agent maqomiga ega shaxs sifatida ro‘yxatga olgan edi. Ushbu qarorga jurnalistning YouTube platformasida monetizatsiya orqali daromad olgani va xorijiy agentlardan iqtibos keltirganida belgilangan tartibga rioya qilmagani sabab bo‘lgan.