Belgiya Toshkentda ilk elchixonasini ochadi
Belgiya Markaziy Osiyo mintaqasida o‘z diplomatik faoliyatini kengaytirish rejalari haqida e’lon qildi va Toshkent shahrida ilk bor elchixona ochishini ma’lum qildi. Bu haqda Zamin.uz xabar berdi.
Bu qaror Belgiya tashqi siyosatidagi keng qamrovli islohotlar doirasida qabul qilinganini Belgiya Tashqi ishlar vazirligi xabar qildi. Vazirlikning ta’kidlashicha, Markaziy Osiyo strategik ahamiyatga ega mintaqa hisoblanadi.
Xususan, "yangi Ipak yo‘li" deb ataluvchi Transkaspiy yo‘nalishining rivojlanishi bu hududga qiziqishni oshirmoqda. Shu sababli, mintaqaga boshqa davlatlar tomonidan faol investitsiyalar jalb qilinayotgani ortidan Belgiya ham global jarayonlardan chetda qolmaslik uchun o‘z pozitsiyasini mustahkamlashga intilmoqda.
Toshkentdan tashqari, Belgiya Albaniyaning Tirana shahri, Namibiyaning Vindxuk shahri va Ummonning Maskat shahrida ham yangi diplomatik vakolatxonalar ochishni rejalashtirgan. Bundan tashqari, Afrika Ittifoqi huzurida doimiy vakil tayinlash uchun Efiopiyaning Addis-Abeba shahrida vakillik tashkil etiladi.
Shu bilan birga, Belgiya sakkizta vakolatxonani yopishga qaror qilgan. Jumladan, Saraevo, Konakri, Bamako va Quvaytdagi elchixonalar, Mozambikdagi diplomatik ofis, shuningdek, Gavanna, Rio-de-Janeyro va Guanchjoudagi konsulliklar faoliyati to‘xtatiladi.
