BFMTV portlash xavfi sabab faoliyatini to‘xtatdi
Fransiyaning mashhur BFMTV telekanali bugun portlash xavfi tufayli o‘z faoliyatini vaqtincha to‘xtatishga majbur bo‘ldi. Bu haqda Zamin.uz xabar berdi.
Bu haqda "Le Parisien" nashri xabar berdi. Ma’lum bo‘lishicha, noma’lum internet foydalanuvchisi telekanal studiyasi joylashgan binoda portlash sodir bo‘lishi mumkinligini ma’lum qilgan.
Xabar mahalliy vaqt bilan soat 15:15 da portlash sodir bo‘lishi haqidagi ogohlantirishni o‘z ichiga olgan. Tahdid haqida xabar tarqalgach, bino zudlik bilan evakuatsiya qilindi va telekanal efirni to‘xtatdi.
Hozirda politsiya hamda sapyorlar guruhi binoda tekshiruv ishlarini olib bormoqda. Huquqni muhofaza qiluvchi idoralar bu tahdidni jiddiy qabul qilib, xabar manbasini aniqlash bo‘yicha izlanishlar olib borayotgani ma’lum qilindi.
