Portugaliya va Britaniyada bo‘ron talafotlari davom etmoqda
15-noyabr kuni kuchli bo‘ron Portugaliyada uch kishining halok bo‘lishiga va o‘nlab odamlarning jarohatlanishiga sabab bo‘ldi. Bu haqda Zamin.uz xabar berdi.
Bo‘ron bir necha kun davomida Portugaliya va Ispaniyada kuchli yomg‘ir va shamol olib kelib, keyin Britaniya va Irlandiyaga yetib bordi. Portugaliyada qutqaruvchilar Fernao Ferro shahrida suv bosgan uy ichida qolib ketgan keksa er-xotinning jasadini topdilar.
Janubiy Portugaliyada tornado sodir bo‘lib, 85 yoshli britaniyalik ayol halok bo‘ldi, 28 kishi jarohat oldi. Ulardan ikki nafari shifoxonaga yotqizildi.
Portugaliya Prezidenti Markelo Rebelo de Souza halok bo‘lgan ayolning yaqinlariga ta’ziya bildirib, jarohatlanganlarga tezroq sog‘ayishni tiladi. Britaniyada Monmut shahri va uning atrofidagi hududlarda kuchli sel uylar, transport vositalari va elektr ta’minotiga jiddiy zarar yetkazdi.
Uelsdagi yong‘in-qutqaruv xizmatlari evakuatsiya ishlarini davom ettirmoqda. Uelsda 11 ta sel ogohlantirishi berilgan bo‘lib, ulardan to‘rt tasi jiddiy deb belgilangan.
Angliyada esa 49 ta sel ogohlantirishi va 134 ta ehtiyot chorasi e’lon qilingan. Havodan olingan videolarda shahar markazlari va turar joylarni suv bosgani yaqqol ko‘rinmoqda.
