Leningradda 385 mln yillik daraxt topildi
Leningrad viloyatida joylashgan Shalovo-Perechitskiy qum konlarida taxminan 385 million yillik daraxt qoldig‘i topildi. Bu haqda Zamin.uz xabar berdi.
Bu haqda Sankt-Peterburg davlat universiteti (SPbDU) paleontologlari ma’lum qilishdi. Ushbu topilma devon davriga tegishli bo‘lib, Rus platformasida uchragan eng qadimiy namunalar qatoriga kiradi.
Olimlar daraxtning rivojlangan ildiz tizimi ilk bor asosiy tana bilan bevosita bog‘liq holda aniqlanganini ta’kidlashmoqda. Topilma prototaksitlarni o‘rganishda muhim ahamiyat kasb etadi.
Bu turdagi o‘simliklarning tabiati haqida olimlar 150 yildan beri bahs yuritib keladi. Dastlab qazishmalar davomida mutaxassislar boshqa bir topilma deb o‘ylashgan, biroq keng ildiz tizimi o‘rganilgach, daraxt qoldig‘i ekanligi tasdiqlandi.
Mutaxassislarning fikricha, bu kashfiyot biologiya va geologiya sohasida bir qancha masalalarni ochib berishga yordam beradi. Jumladan, daraxtning taksonomik mansubligini aniqlash, ilk o‘simliklarning geografik tarqalishi va ularning quruqlikka moslashuv mexanizmlarini o‘rganish mumkin bo‘ladi.
Shuningdek, bu topilma yerdagi ilk tuproq qatlamlarining shakllanish jarayonlarini chuqurroq tushunishga xizmat qiladi. Tadqiqotlar yakunlangach, 385 million yillik daraxt tanasi Sankt-Peterburg davlat universitetining Paleontologiya muzeyida saqlanadi.
