Qozog‘istonda 11 shaharda havo sifati yomonlashdi

Qozog‘istonning bir qancha hududlarida havo sifati yomonlashmoqda. Bu haqda Zamin.uz xabar berdi.

Mamlakatning ekologik xizmati – “Kazgidromet”ning ma’lumotiga ko‘ra, 17-noyabr kuni 11 ta shaharda havodagi zararli moddalar miqdori me’yordan oshishi mumkin. Ushbu shaharlarga Olmaota, Ostona, Atirau, Oqtobe, Chimkent, Qarag‘anda, Jezqazg‘an, Temirtov, Balxash, O‘skemen va Ridder kiradi.

Mutaxassislar bu holatni shamolning zaifligi, tuman va atmosfera inversiyasi bilan bog‘lamoqda. Bunday sharoitda zararli gazlar va chang zarralari havoda tarqalmay, yer sathiga yaqin to‘planib qoladi.

Bu esa nafas olishni qiyinlashtiradi va ekologik muammolarni kuchaytiradi. Aholiga ochiq havoda kamroq yurish, ayniqsa avtomobil yo‘llaridan uzoqroq bo‘lish tavsiya etilmoqda.

O‘pka kasalliklari, allergiya yoki yurak-qon tomir muammolari bo‘lgan fuqarolarga o‘zlari bilan kerakli dori vositalarini olib yurish maslahat berilgan. So‘nggi yillarda Olmaota, Qarag‘anda va Temirtov shaharlari mamlakatning eng iflos havoli hududlari sifatida qayd etilmoqda.

Qish mavsumining boshlanishi va havo harakatining pasayishi esa ushbu muammoni yanada jiddiylashtirishi mumkin.