Turkiyaning Trabzon viloyati, O‘rtahisar tumanida o‘tkazilgan to‘y marosimida ovqatdan zaharlanish holati qayd etildi. Bu haqda Zamin.uz xabar berdi.
Mazkur hodisa haqida Haber Global xabar berdi. Ma’lum qilinishicha, to‘y dasturxonida tortilgan palovdan so‘ng 100 ga yaqin mehmon o‘zini yomon his qila boshlagan.
Ular ko‘ngil aynishi, qusish va tana harorati ko‘tarilishi kabi alomatlardan shikoyat qilishgan. Zaharlangan fuqarolar tezkor ravishda yaqin atrofdagi shifoxonalarga yetkazilgan.
Shifokorlarning ma’lumotiga ko‘ra, jabrlanganlarning umumiy ahvoli barqaror, biroq ayrim bemorlar kuzatuv ostida qolmoqda. Hodisa yuzasidan mahalliy sog‘liqni saqlash idoralari tekshiruv ishlarini boshlab yuborgan.
Zaharlanishga aynan qaysi mahsulot sabab bo‘lgani hozircha aniqlanmagan. Shu bilan birga, to‘y oshpazlari va xizmat ko‘rsatgan xodimlardan namunalar olingan bo‘lib, ular laboratoriya tahliliga yuborilgan.
Hozirda mazkur voqea bo‘yicha surishtiruv ishlari davom etmoqda. Mahalliy tashkilotlar vaziyatni nazorat ostiga olgan.
